کسی دن لوٹ آئیں گے

کسی دن لوٹ آئیں گے
ہم اس برباد بستی میں، 
جہاں ہر لمحہ، ہر ساعت،
کوئی روح زخم کھاتی ہے 
جہاں کے لوگ 
طبعی موت 
اب 
کچھ کم ہی مرتے ہیں، 
جہاں بارود، بم، 
اور خنجروں سے
سینکڑوں لوگوں کو 
یونہی مارا جاتا ہے 
جہاں تیزاب کا بوتل 
حسین چہروں کے اوپر
پھینکا جاتا ہے 

جہاں قانون کا بس 
صرف کمزوروں پہ چلتا ہے 
جہاں کی عدلیہ خود 
عدل کی راہ میں 
رکاوٹ ہے 

یہ بستی بربریت، جھوٹ 
اور وحشت کی بستی ہے 
مگر پھر بھی 
نہ جانے کیوں 
ہمیں اس دشت پر آشوب سے 
اتنی محبت ہے 

ہم اس برباد بستی میں، 
اگر کچھ بھی نہ کر پائیں، 
لہو دل کا گرائیں گے 
کسی دن لوٹ آئیں گے