کاش میں شہزادی کی جلی ہوئی لاش کا چہرہ نہیں دیکھتا

کاش میں اسکا چہرہ نہیں دیکھتا۔

جلے ہوئے چہرے پر کچھ دانتوں، جلے ہوئے بالوں اور ایک دہشتناک اندھیرے کے علاوہ کچھ نظر بھی تو نہیں آرہا تھا۔ 

پاس کھڑی اس بارہ سالہ "شہزادی" (بچی کا نام) کی والدہ بین کر رہی تھی۔ دہائی دے رہی تھی۔ ماتم کناں تھی۔

"ظالموں نے میرے بچے کو جلا دیا"۔

"ظالموں نے میری پھول جیسی بچی کے ساتھ زیادتی کی"۔ 

"کوئی مجھے انصاف دیدے۔"

"کوئی میری فریاد سنے۔"

"ارے میری بیٹی تو ٹیوشن پڑھنے گئی تھی۔"

اسلام آباد کے نواحی علاقے بارہ کہو کی بارہ سالہ شہزادی کو جنسی زیادتی کا نشانہ بنانے کے بعد جلا کر قتل کر دیا گیا تھا، یا پھر قتل کر کے جلا دیا گیا تھا۔

اس بچی کی تصویر کیمروں کے سامنےلہرائی جا رہی تھی۔ 

وہ پھول سی بچی کون تھی اور یہ سوختہ لاش کون ہے؟ اور اس پھول جیسی بچی کو کس جرم کی سزا دی گئی ہے؟ میں نے خود سے سوال کیا۔ 

جواب نہیں ملا۔ 

"اگر یہ کسی بڑے باپ کی بیٹی ہوتی تو میڈیا آسمان سر پر اٹھا لیتی۔ ہے کوئی جو اس غریب بچی کی بات کرے؟"۔ مظاہرین میں موجود ایک خاتون روتے ہوئے کہہ رہی تھی۔

میں اپنے دوستوں کے ساتھ وہاں سے گزر رہا تھا۔ کچھ تصویریں لیں۔ کچھ لوگوں سے ہلکی پھلکی معلومات لیں۔ تھوڑی دیر افسوس کا اظہار کیا۔ سیاستدانوں اور ملک کے حکمرانوں کو گالیاں دیں۔ اور پھر گھر کی طرف چل پڑا۔ 

پارلیمنٹ ہاوس کے سامنے واقع بلیو ایریا کے روڑ پر کچھ خواتین اور مرد ایک تابوت سڑک پر رکھے احتجاج کر رہے تھے۔ پولیس کے ڈنڈا بردار اہلکاروں نے روڑ کو بلاک کر دیا تھا۔ کچھ سینئر پولیس اہلکار اور انتظامیہ کے کچھ نمائندے سراپا احتجاج لوگوں سے گفت و شنید کرنے کی کوشش میں لگے تھے۔ بلیو ایریا پر اندھیرا دھیرے دھیرے اتر رہا تھا اور مصنوعی قمقمے اجالا کرنے کی کوششوں میں مصروف تھے۔ 

اس جلی ہوئی لاش کی سیاہی قہقہے لگا کر معاشرے اور انسانیت کی موت کی خبر سنا رہی تھی۔ اور مجھے اس قہقہے سے خوف آرہا تھا۔

کاش میں شہزادی کی جلی ہوئی لاش کا چہرہ نہیں دیکھتا۔