ہنزہ نگر کے باسیوں کو کون لڑانا چاہتا ہے؟

وادی گوجال کے گاؤں حسینی اور مشہور سیا حتی مقام بوریت میں جو کچھ بھی ہوا  وہ انتہائی افسوسناک اور قابل مذمت ہے.

 اس پرامن علاقے میں تشدد اور نفرت کی یہ خطرناک لہر کیوں اور کیسے پیدا ہوئی، افواہیں پھیلانے والے کون ہیں ، نفرتیں بڑھانے سے کس کو فائدہ پہنچ سکتا 

ہے؟

١٩٨٠ کے دہائی سے سوست کے مقام پر ایک ساتھ کام کرنے والے افراد کیونکر اچانک ایک دوسرے کے گریبانوں تک جا پہنچے؟ چھوٹی موٹی لڑائیاں تو سننے میں آتی تھیں، لیکن یہ اندوہناک  معرکہ آخر کن عوامل کی وجہ سے رونما ہوئی؟

وہ کون  لوگ تھے جنہوں نے ایک معمولی قسم کے جھگڑے کے فورا بعد وادی نگر 

میں یہ افواہ پھیلائی کہ حسینی گوجال میں نگر کے چار افراد کو بیدردی سے قتل کیا  گیا ہے اور ان کی لاشیں گری پڑی ہیں؟ وہ علاقہ جہاں پچھلے پچاس سالوں میں چار قتل نہیں ہوے،اس علاقے کے بارے میں یہ گمراہ کن خبر پھیلانے والے بدبخت کون تھے؟ 

 نگر کے سادہ مزاج لوگوں کو ایک جھوٹی خبر کے ذریعے  مشتعل کر کے یہ شرپسند کونسے مقاصد حاصل کرنا چاہتے تھے؟ 

گوجال اور ہنزہ کے لوگوں کو اشتعال دلانے کے لیے جماعت خانے کی بے حرمتی کی گمراہ کن خبر کن لوگوں نے پھیلائی تھی؟  

اور اگر کسی بد خواہ نے ایسی غلط خبریں پھیلائی بھی تھی، توبغیر سوچے سمجھے ایک دوسرے پر حملہ آور ہونے  اور املاک کو نقصان پہنچانے والے افراد نے اپنے آپ سے ایک دفعہ بھی سوال کیوں نہیں پو چھا؟  خبر کی تصدیق کرنے کی زحمت کیوں نہیں کی؟ حکومتی اداروں کو آگاہ کیوں نہیں کیا ؟ 

پولیس کے وہ اہلکار جو مبینہ طور پر ایک گروہ کی طرفداری میں سارے حدود سے گزر گئے، ان کے کیا مقاصد تھے؟ کیا اپنے علاقے کے لوگوں کا "درد" ان کو رندانہ جرات پر مجبور کر گیا یا ابھی کچھ اور حقائق پوشیدہ ہیں؟  

 یہ چند ایسے سوالات ہیں جن کا بروقت جواب حاصل کرنا بہت لازمی ہے، تاکہ موثر انداز میں مسائل کے حل کی طرف بڑھا جا سکے. ہنزہ نگر کا نیا انتظامی ڈھانچہ ابھی اپنے ابتدائی ایام میں ہے اور اس طرح کے واقعات کی وجہ سے مزید شکوک و شبہات پیدا ہو رہی ہیں، جنکا براہ راست اثر انتظامی سیٹ اپ پر پڑ رہا ہے.

 ضرورت اس امر کی ہے کہ اس نومولود ضلع میں امن، برداشت، انصاف اور اخوت کا ایسا ماحول پیدا کیا جاسکے جس میں عام لوگ سکھ کا سانس لے کر اپنے مسائل کو حل کرنا شرو ع کر سکے. امید یہی ہے کہ مقتدر حلقے ان مسائل کو حل کرنے کے لیے سر جوڑ کر بیٹھ جائینگے، تاکہ ایک بہتر مستقبل کے لیے راہ ہموار کیا جا سکے.